女友生日,對男友嚟講唔多唔少都會造成壓力,因為生日過得開開心心係應份嘅,但係如果當中有咩差池,足以令女友記你一世。如果有得揀,相信唔少男友會想自己女友2月29日生日,四年先搞一次生日,人生確實輕鬆好多!

當然,我地都收過唔少關於生日嘅投稿,有啲係女友生日有啲係男友生日(冇錯!就算係自己生日都會瀨野),大致可以分為以下幾類:

#女友投稿
我問男朋友我生日日期係幾號
佢好確實講左個錯既日期,然後仲話用左呢個錯既生日日期做密碼
我嬲到傻左

#女友投稿
男友今日懶sweet咁請半日假陪我!我滿心歡喜之際問佢:「做咩今日陪我咁好呀?」
佢:「大佬!你星期六生日邊請到假呀!咪今日請假陪咗你先囉!」
但我其實下星期二生日…

#女友投稿
男友同我同公司,佢負責編更
佢一路都話我生日同我食飯,點知佢編我生日返工但係佢放假
然後,我嬲到笑 (佢話佢冇留意…)

#女友投稿
當我難得有晚可以早瞓嘅時候
零晨十二點半男友打嚟同我講生日快樂!
但其實我生日唔係今日囉!
然後,我嬲到醒晒!

#男友投稿
女友唔記得咗我生日,但係我無嬲。
然後,佢嬲咗我。


 
#女友投稿
我生日,男友同我食放題,侍應拎住個壽司蛋糕播住生日歌行過嚟
我好興奮咁問男朋友:「係咪我架?」
男友唔出聲,我地望住侍應行到隔離張枱,放低咗個蛋糕
然後,我嬲咗佢

#男友投稿
我生日,女友喺我唔知情下嚟咗我屋企等我切生日蛋糕,
點知我去左同朋友聚會
然後,佢嬲到痴線

 

#女友投稿
男友第一年同我慶祝生日,佢無買生日蛋糕
但塞左個硬既唐記壽包俾我

#男友投稿
同女友攪生日party,喺蛋糕上面,插滿同佢歲數相同既爉燭。
然後,佢嬲咗我

#女友投稿
我生日,男友帶我食譚仔三哥!
然後,我嬲咗佢

留言板